Breytingar á gjaldskrám skóla: Gjaldfrjálsar skólamáltíðir í haust
Bæjarstjórn hefur samþykkt breytingar á gjaldskrám leikskóla, grunnskóla og dægradvalar með gildistíma 1. ágúst 2024 til 31. júlí 2025. Meðal annars verða skólamáltíðir í grunnskólum gjaldfrjálsar en einnig lækkar dvalargjald leikskóla og daggjald og hressing í dægradvöl.
Alþingi samþykkti um helgina frumvarp Svandísar Svavarsdóttur innviðaráðherra um breytingu á lögum um tekjustofna sveitarfélaga sem heimilar Jöfnunarsjóði sveitarfélaga að greiða framlög til sveitarfélaga sem bjóða upp á skólamáltíðir.
Gjaldfrjálsar skólamáltíðir eru liður í aðgerðum stjórnvalda til að styðja við nýgerða langtímakjarasamninga á vinnumarkaði og leggja grundvöll að bættum lífskjörum og kaupmætti launafólks.
Helstu breytingar á gjaldskrám, sem samþykktar voru af bæjarstjórn á fimmtudaginn síðastliðinn, eru raktar hér fyrir neðan.
Leikskólar
Dvalargjald frá kl. 8:00-14:00 lækkar um 6% og aðrir liðir í gjaldskrá leikskóla lækka um 3%. Gjald fyrir umframtímana fyrir kl. 8:00 og eftir kl. 16:00 verður áfram dýrasti tíminn.
| Þjónusta | 2023 | 2024 (til 31. júlí) | 2024-2025 | Breyting frá áramótum |
| Leikskólagjald - tímagjald fyrir 4-6 tíma vistun - nýtt | 3.723 kr. | 3.950 kr. | 3.723 kr. | -6% |
| Leikskólagjald - tímagjald fyrir 6+ tíma vistun - nýtt | 3.723 kr. | 3.950 kr. | 3.835 kr. | -3% |
| Leikskólagjald - tímagjald utan kl. 8-16 tímabils | 7.446 kr. | 7.900 kr. | 7.669 kr. | -3% |
| Álag vegna ítrekaðrar seinkunar | 1.910 kr. | 2.020 kr. | 1.970 kr. | -2,5% |
| Hádegisverður, mánaðargjald | 6.490 kr. | 6.880 kr. | 6.680 kr. | -3% |
| Morgunhressing, mánaðargjald | 4.200 kr. | 4.450 kr. | 4.330 kr. | -3% |
| Síðdegishressing, mánaðargjald | 4.200 kr. | 4.450 kr. | 4.330 kr. | -3% |
| Skráningardagur - nýtt | 2.700 kr. | Nýtt |
Sem fyrr geta foreldrar sem falla undir tekjuviðmið sótt um að fá 40% afslátt af almennu dvalargjaldi. Systkinaafsláttur er 40% með öðru barni og gjaldfrjálst er fyrr þriðja barn.
Sjá nánar í frétt um breytingar á skipulagi og starfsumhverfi í leikskólum Ísafjarðarbæjar.
Grunnskólar
Matarþjónusta nemenda í grunnskóla verði endurgjaldslaus veturinn 2024/2025. Ísafjarðarbær tryggir gjaldfrjálsar skólamáltíðir fyrir nemendur í gunnskóla sveitarfélagsins í samstarfi við ríkið og með fyrirliggjandi kostnaðarþátttöku þess.
- Hádegisverður verður gjaldfrjáls.
- Hafragrautur fyrir öll stig nemenda verður gjaldfrjáls.
- Ekki verður boðið upp á ávexti eða mjólk.
Dægradvöl
- Daggjald Dægradvalar taki ekki hækkunum veturinn 2024/2025 og verður áfram 900 kr.
- Hressing í Dægradvöl verði gjaldfrjáls, í stað 150 kr. daggjalds.
Tengdar fréttir
Starfshópur um skipulag og starfsumhverfi í leikskólum Ísafjarðarbæjar settur á fót
Breytingar á skipulagi og starfsumhverfi í leikskólum Ísafjarðarbæjar