Breytingar á gjaldskrám skóla: Gjaldfrjálsar skólamáltíðir í haust og lægri leikskólagjöld

Bæjarstjórn hefur samþykkt breytingar á gjaldskrám leikskóla, grunnskóla og dægradvalar með gildistíma frá 1. ágúst 2024. Meðal annars verða skólamáltíðir í grunnskólum gjaldfrjálsar og hressing í dægradvöl, en einnig lækkar dvalargjald leikskóla og daggjald í dægradvöl.

Alþingi samþykkti um helgina frumvarp Svandísar Svavarsdóttur innviðaráðherra um breytingu á lögum um tekjustofna sveitarfélaga sem heimilar Jöfnunarsjóði sveitarfélaga að greiða framlög til sveitarfélaga sem bjóða upp á skólamáltíðir.

Gjaldfrjálsar skólamáltíðir eru liður í aðgerðum stjórnvalda til að styðja við nýgerða langtímakjarasamninga á vinnumarkaði og leggja grundvöll að bættum lífskjörum og kaupmætti launafólks.

Helstu breytingar á gjaldskrám, sem samþykktar voru af bæjarstjórn á fimmtudaginn síðastliðinn, eru raktar hér fyrir neðan.

Leikskólar

Ný gjaldskrá tekur gildi 1. ágúst 2024. Viðmiðunargjaldskráin skólaárið 2024-2025 hefur 204 vistunardaga og 8 skráningardaga. Rukkað er meðaltalsgjald á mánuði miðað við 11 mánuði. Skráningardagar á skólaárinu eru ekki inn í viðmiðunargjaldi vistunar.

Sem fyrr geta foreldrar sem falla undir tekjuviðmið sótt um að fá 40% afslátt af almennu dvalargjaldi. Systkinaafsláttur er 40% með öðru barni og gjaldfrjálst er fyrr þriðja barn.

Sjá nánar í frétt um breytingar á skipulagi og starfsumhverfi í leikskólum Ísafjarðarbæjar.

Grunnskólar

Matarþjónusta nemenda í grunnskóla verði endurgjaldslaus veturinn 2024/2025. Ísafjarðarbær tryggir gjaldfrjálsar skólamáltíðir fyrir nemendur í gunnskóla sveitarfélagsins í samstarfi við ríkið og með fyrirliggjandi kostnaðarþátttöku þess.

• Hádegisverður verður gjaldfrjáls.
• Hafragrautur fyrir öll stig nemenda verður gjaldfrjáls.
• Ekki verður boðið upp á ávexti eða mjólk.

Dægradvöl

• Daggjald Dægradvalar taki ekki hækkunum veturinn 2024/2025 og verður áfram 900 kr.
• Hressing í Dægradvöl verði gjaldfrjáls, í stað 150 kr. daggjalds. 

Tengdar fréttir
Starfshópur um skipulag og starfsumhverfi í leikskólum Ísafjarðarbæjar settur á fót
Breytingar á skipulagi og starfsumhverfi í leikskólum Ísafjarðarbæjar