Vísindaport - Lengst útí rassgati

Í Vísindaporti vikunnar ætlar Ólöf Dómhildur Jóhannsdóttir bæjarlistamaður að koma og fjalla um meistaraverkefni sitt sem hún vann í náminu Hagnýt menningarmiðlun við Háskóla Íslands. Verkefnið hennar var listahátíðin LÚR festival. LÚR festival er hátíð fyrir ungt fólk sem hefur verið haldin í tvígang á Ísafirði, sumarið 2014 og 2015.

Í samfélagi þar sem brottflutningur er eitt af stóru vandamálunum er mikilvægt að hlúa að hugðarefnum ungs fólks. Ungt fólk er framtíð Vestfjarða, eða er það ekki? Margar listahátíðir erlendis eru með áherslu á sjálfbæra þróun og umhverfisvernd en með LÚR er lögð áhersla á barráttuna um að byggð haldist um landið. Ólöf Dómhildur mun fjalla um hátíðina og hver séu næstu skref hvað hana varðar.

Ólöf Dómhildur lauk námi í myndlist frá Listaháskóla Íslands árið 2006 og MA gráðu í Hagnýtri menningarmiðlun frá Háskóla Íslands árið 2015. Hún starfar sem myndmenntakennari við Grunnskólann á Ísafirði ásamt því að vera starfandi myndlistarmaður og  vinna að ýmsum öðrum verkefnum.

Vísindaportið er öllum opið og að þessu sinni fer það fram á íslensku.