Þrettándagleði í Bolungarvík

Á þrettánda degi jóla verður hin árlega þrettándagleði Bolungarvíkurkaupstaðar og Ísafjarðarbæjar haldin við Hreggnasa í Bolungarvík. Þangað koma álfar og kóngafólk, prinsar og prinsessur, stallari, biskup og skratti, bændafólk, álfameyjar, ljósálfar og svartálfar, jólasveinar, púkar, Grýlubörn og svo auðvitað Grýla sjálf með Leppalúða sínum.

Dans verður stiginn og söngvar sungnir við hljóðfæraspil og þrettándabrennu svo sem vera ber á þrettándanum.

Hátíðarsvæðið er við Hreggnasa fyrir ofan Grunnskóla Bolungarvíkur og heilsugæslustöðina og hefst hátíðin kl. 20:00 föstudaginn 6. janúar 2017.

Löng hefð er fyrir því að þrettándagleðin endi á flugeldasýningu sem Björgunarsveitin Ernir í Bolungarvík stendur fyrir.

Sveitin verður einnig með flugeldasölu föstudaginn 6. janúar kl. 16-18 við Hafnargötuna.