Samið við Knattspyrnudeild Vestra yngri um byggingu viðbyggingar við áhorfendastúku
Ísafjarðarbær og Knattspyrnudeild Vestra yngri hafa gert með sér samning um byggingu viðbyggingar við áhorfendastúku á Torfnesvelli og afnot af henni í kjölfar byggingar.
Markmið framkvæmdarinnar er meðal annars að auka þjónustu við áhorfendur á Torfnesvelli með því að útbúa söluaðstöðu á vellinum. Viðbyggingin verður 68,9 fermetrar og mun standa ofan á suðurenda stúkunnar. Ísafjarðarbær verður skráður eigandi mannvirkisins en Knattspyrnudeild Vestra yngri er ábyrgðar-, framkvæmda- og byggingaraðili og sér um hönnun, aðal- og séruppdrætti ásamt öðru framlagi, svo sem vinnu og ráðningu iðnmeistara.
Knattspyrnudeildin fjármagnar alla framkvæmd vegna byggingarinnar og greiðir byggingarkostnað, fyrir utan gatnagerðargjöld, byggingarleyfisgjöld og byggingarstjórn, sem greiðist af Ísafjarðarbæ.