Milljarður rís í Edinborg

UN Women á Íslandi býður alla hjartanlega velkomna á viðburðinn Milljarður rís í Edinborgarhúsinu á föstudag milli klukkan 12 og 13. „Í ár heiðrum við minningu Birnu Brjánsdóttur. Tökum höndum saman og berjumst gegn kynbundnu ofbeldi með væntumþykju, hlýju og dansi“, segir í tilkynningu frá samtökunum.

Milljarður rís er dansbylting sem haldin er víða um heim. Með samtakamætti lætur heimsbyggðin til sín taka. Yfir milljarður karla, kvenna og barna kemur saman til að dansa fyrir réttlæti, fyrir heimi þar sem konur þurfa ekki að óttast ofbeldi og áreiti fyrir það eitt að vera konur.