Haustlægðirnar og lausamunir
Nú þegar haustlægðirnar fara láta á sér kræla er ýmislegt sem þarf að gæta að, til dæmis eru það lausamunirnir sem eiga auðvelt með að taka á loft.
Trampólín eiga það til að fara í skoðunarferðir og ruslatunnurnar fylgja oft skammt undan.
Því viljum við hvetja fólk til að festa ruslatunnurnar og aðra lausamuni sem geta farið af stað.
Ralf Trylla, Umhverfisfulltrúi Ísafjarðarbæjar, biður íbúa sérstaklega um að hugsa vel að ruslatunnufestingum svo það sé auðvelt að losa þær frá... við tæmingu. Best er ef auðvelt er að losa tunnurnar frá snarlega með einni hendi, vettlingaklæddri.
Ruslatunnulokin eiga það til að opnast í vindi og getur valdið því að rusl fari af stað, með tilheyrandi sjónmengun, sem er öllum til ama. Teygjur eru góð góð við þessu vandamáli, en hafa skal þó í huga að losun geti farið óhindrað og auðveldlega fram.
Svo þegar líða tekur á veturinn og fer að snjóa ber að moka vel frá tunnum og ruslakerrum svo tæming geti farið auðveldlega fram.