Fasteignagjöld 2022
Búið er að birta álagningarseðla fasteignagjalda 2022 á minarsidur.island.is og hafa greiðsluseðlar verið sendir út í netbanka.
Allar upplýsingar um álagningu fasteignagjalda og greiðslufyrirkomulag má finna í samantekt um fasteignagjöld.
Vakin er athygli á því að á árinu 2022 er gjalddögum fjölgað úr 10 í 12 og verða fasteignagjöld því innheimt mánaðarlega framvegis, fyrir utan fasteignagjöld sem eru 45.000,- eða lægri, þau eru innheimt með einum gjalddaga 15. apríl.
Nánari upplýsingar og aðstoð við að:
- skrá sig í boðgreiðslu fasteignagjalda
- óska eftir að fá senda greiðsluseðla fyrir fasteignagjöldum
- óska eftir að fá senda álagningarseðla
- senda inn erindi vegna fasteignagjalda
má fá með því að senda fyrirspurn á innheimta@isafjordur.is eða í síma 450 8000.
Umsóknir um afslátt af fasteignagjöldum fyrir elli- og örorkulífeyrisþega fara í gegnum velferðarsvið en hægt er að sækja um rafrænt í þjónustugátt.
Fasteignamat er gefið út árlega af Þjóðskrá Íslands og hækkaði um 19% frá árinu 2021. Ef fasteignamat íbúðarhúsnæðis er skoðað eftir byggðakjörnum þá hækkaði fasteignamatið mest í sérbýli í eldri byggð á Ísafirði, eða 32%.
|
Matssvæði |
% breyting fyrir sérbýli |
% breyting fyrir fjölbýli |
|
Ísafjörður: Eldri byggð |
32,1,0% |
22,6% |
|
Ísafjörður: Nýrri byggð |
16% |
37% |
|
Hnífsdalur |
43% |
1% |
|
Suðureyri |
11% |
0,5% |
|
Flateyri |
18% |
0,9% |
|
Þingeyri |
7% |
0,9% |
|
Hornstrandir |
0,0% |
0,0% |
Fasteignagjöld sveitarfélagsins eru lögð árlega á flestar fasteignir í sveitarfélaginu sem metnar eru fasteignamati samkvæmt fasteignaskrá. Á árinu 2022 nema fasteignagjöld 757 m.kr. og hækka samanlagt um 7% milli ára.
Fasteignaskattur er einn liður fasteignagjalda og er jafnframt þriðji stærsti tekjustofn sveitarfélagsins. Fasteignaskattur á íbúðarhúsnæði var lækkaður á árinu 2021 úr 0,625% í 0,56% og er óbreyttur á árinu 2022. Lóðarleiga á íbúðarhúsnæði var lækkuð á árinu 2022 úr 1,8% í 1,5% og vatnsgjald á íbúðarhúsnæði var lækkað úr 0,1% í 0,02% og holræsagjald á íbúðarhúsnæði var lækkað úr 0,2% í 0,15%. Er með þessu komið til móts við þá hækkun sem annars hefði orðið vegna hækkunar fasteignamats.
Fasteignaskattur á árinu 2022 hækkar um 16,4% frá fyrra ári eða úr 375 m.kr í 436 m.kr. Lóðarleiga hækkar samanlagt um 5,8% á meðan holræsagjöld lækka um 4,4% sorpgjöld hækka um 10,5% og vatnsgjöld lækka um 33,4%.
Kærufrestur er til 28. febrúar 2022.