Fasteignagjöld 2020

Búið er að birta álagningarseðla fasteignagjalda 2020 á www.island.is og hafa greiðsluseðlar verið sendir út í netbanka. Yfirlit reikninga má einnig finna í bæjardyrum rafræns Ísafjarðarbæjar.

Allar upplýsingar um álagningu fasteignagjalda og greiðslufyrirkomulag má finna í samantekt um fasteignagjöld sem er birt undir gjaldskrám Ísafjarðarbæjar.

Fasteignamat er gefið út árlega af Þjóðskrá Íslands og hækkaði um 9,6% milli ára í Ísafjarðarbæ. Ef fasteignamat íbúðarhúsnæðis er skoðað eftir byggðakjörnum þá hækkaði fasteignamatið mest í nýrri byggð á Ísafirði, eða 18,4%.

Fasteignagjöld sveitarfélagsins eru lögð árlega á flestar fasteignir í sveitarfélaginu sem metnar eru fasteignamati samkvæmt fasteignaskrá. Á árinu 2020 nema fasteignagjöld 650 m.kr. og hækka samanlagt um 1,4% milli ára sem er í samræmi við markmið sveitarfélaga út frá lífskjarasamningum 2019-2022.

Fasteignaskattur er einn liður fasteignagjalda og er jafnframt þriðji stærsti tekjustofn sveitarfélagsins og hækkar hann um 9,9% á milli ára sem er í takt við hækkun á fasteignamati sem er um 9,6%. Lóðarleiga hækkar samanlagt um 6,4% á meðan holræsagjöld lækka um 4,4%, sorpgjöld lækka um 4,3% og vatnsgjöld lækka um 26%. Skatthlutfall vatnsgjalds á íbúðarhúsnæði lækkaði frá fyrra ári úr 0,205% í 0,1% og skatthlutfall holræsagjalds á íbúðarhúsnæði lækkaði úr 0,25% í 0,2%. Sorpförgunargjald var einnig lækkað á milli ára þar sem gjaldtaka var tekin upp á umframúrgangi, eins og lesa má um í frétt frá 19. desember 2019. 

Nánari upplýsingar og aðstoð má fá með því að senda fyrirspurn á innheimta@isafjordur.is eða í síma 450 8000, meðal annars til að:

• Skrá sig í boðgreiðslu fasteignagjalda.
• Óska eftir að fá senda greiðsluseðla fyrir fasteignagjöldum þar sem þeir verða, líkt og áður, ekki sendir út til greiðenda fæddra eftir 1946.
• Óska eftir að fá senda álagningarseðla.
• Senda inn erindi vegna fasteignagjalda.

Kærufrestur er til 28. febrúar 2020.