Daggæslu- og leikskólamál

Nokkrar breytingar verða á daggæslu- og leikskólamálum á Ísafirði í fyrirsjáanlegri framtíð, en barnalán bæjarbúa hefur orðið nokkru meira en færustu excel-hagfræðingar reiknuðu með fyrir örfáum árum. Önnur tveggja dagmæðra bæjarins er að hætta, en ný dagmóðir hefur sótt um leyfi og getur vonandi tekið til starfa um næstu mánaðamót. Eins og áður er stefnt að því að börn komist á leikskóla 18 mánaða gömul, stundum komast þau að 16 mánaða en í einhverjum tilfellum geta þau þurft að bíða til 20 mánaða aldurs.

Fyrir nokkrum dögum var opnuð viðbótardeild á Austurvegi 9 til að liðka til fyrir nýjum börnum á Sólborg. Til að koma í veg fyrir endalausar reddingar er nú hafin vinna við hönnun viðbyggingar við Eyrarskjól, þar sem húsnæðið hentar betur til stækkunar en Sólborg. Þegar hún verður klár eykst leikskólapláss talsvert og við ættum að vera betur í stakk búin til að taka á fjölgun barna. Lögð er áhersla á að hefjast handa við viðbygginguna á næsta ári, en þangað til hún verður fullbúin þarf að leysa málið tímabundið. Nokkrar hugmyndir eru á borðinu og er ekkert útilokað í þeim efnum.

Eins og alltaf eru góðar hugmyndir vel þegnar og má koma þeim til formanns fræðslunefndar og/eða sviðsstjóra skóla- og tómstundasviðs.

Foreldrar barna sem verða 18 mánaða á næstu mánuðum og strax eftir sumarfrí munu fá bréf á allra næstu dögum með boð um skólavist.