Auglýst eftir fyrirtækjum vegna uppbyggingar og reksturs ljósleiðaraneta

Fjar­skipta­sjóður áformar fram­hald af verk­efninu Ísland ljóstengt með það að mark­miði að ljúka styrktri ljós­leið­ara­væð­ingu heim­il­is­fanga með eitt eða fleiri lögheimili í öllum þétt­býl­is­stöðum og byggða­kjörnum landsins fyrir árslok 2026 á grund­velli samvinnu íbúa, sveit­ar­fé­laga, fjar­skipta­fyr­ir­tækja og ríkisins. 

Ísafjarðarbær hefur tekið boði um að taka þátt í verkefninu í gegnum Fjarskiptasjóð en í sveitarfélaginu eru 101 staðföng ótengd. Hámarksstyrkupphæð getur verið 8.080.000 kr. án vsk. 

Af þessu tilefni auglýsir Ísafjarðarbær eftir fjarskiptafyrirtækjum sem hafa áhuga á að taka að sér uppbyggingu og rekstur ljósleiðaraneta í þéttbýli sveitarfélagsins fyrir árslok 2026.

Fjarskiptafyrirtækin skulu hafa samband við sveitarfélagið með því að senda póst á bygg@isafjordur.is fyrir 1. september. 

Upplýsingar um eftirfarandi þurfa að koma fram í póstinum

• Hvort fjarskiptafyrirtæki áformi að tengja styrkhæf heimilisföng á markaðslegum forsendum í byggðarkjörnum Ísafjarðarbæjar.
• Hvort fjarskiptafyrirtæki áformi að leggja og tengja eigið ljósleiðaranet í skurði/lagnaleið sem sveitarfélagið styrkir.
• Hvernig fjarskiptafyrirtæki áformi framkvæmd uppbyggingar ljósleiðarakerfisins hvað varðar forgangsröðun og tímasetningar.

Lista yfir styrkhæf heimilisföng í Ísafjarðarbæ geta áhugasöm fjarskiptafyrirtæki nálgast með því að hafa samband við bygg@isafjordur.is.