Guðbjartur Hannesson, nýr heilbrigðisráðherra, tók í dag við lyklavöldum í heilbrigðisráðuneytinu úr hendi Álfheiðar Ingadóttur, sem lét af embætti heilbrigðisráðherra í dag. Hann segir sameiningu heilbrigðisráðuneytisins og félagsmálaráðuneytisins í eitt velferðarráðuneyti vera stærsta verkefni sitt í embætti. Þá sagðist hann ekki hafa átt von á því að verða ráðherra og tók því ekki jakkafötin með ofan af Akranesi í morgun að því er segir á mbl.is.

Verkalýðsfélag Vestfirðinga segir að róðurinn verði ekki auðveldur er kemur að undirbúningi kjarasamninga, vegna skorts á trausti í garð ríkisins. Stjórnvöld hafa ekki staðið við mikilvæga þætti í stöðugleikasáttmálanum svonefnda, sem leiða af sér vantraust á þeim loforðum sem þau hafa gefið í tengslum við hann, segir í pistli sem birtur hefur verið á vef Verkalýðsfélags Vestfirðinga. Þar er minnt á að ASÍ sagði sig frá sáttmálanum vegna þessa og gagnrýndi lengi aðgerðaleysi í atvinnumálum og svik varðandi lögbindingu fjár til Starfsendurhæfingarsjóðs. Flestir kjarasamningar eru lausir frá og með 30. nóvember, að undanskildum samningum sjómanna, en samningar þeirra losna 1. janúar 2011. „Stéttarfélögin hafa nú í höndum mikla vinnu og leita til félagsmanna um hvaða áherslur og kröfur eigi að gera. “

Ísfirski harmónikkuleikarinn, Helga Kristbjörg Guðmundsdóttir, hlaut í gær veglegan styrk úr Styrktarsjóði Halldórs Hansen. Styrktarsjóðurinn starfar undir væng Listaháskóla Íslands og veitir árlega styrki til tónlistarnema sem hafa að mati sjóðsstjórnar náð framúrskarandi árangri á sínu sviði. Þetta mun vera í sjöunda sinn sem veittir eru styrkir úr sjóðnum, og er Helga Kristbjörg annar Ísfirðingurinn sem hann hlýtur. Herdís Anna Jónasdóttir söngkona hlaut styrkinn 2006. Þess má geta að það var Ísfirðingurinn Hjálmar H. Ragnarsson, rektor LHÍ, sem afhenti styrkina en einnig hlaut Andri Björn Róbertsson bassabarítón styrk úr sjóðnum. Boðið var til hátíðardagskrár af þessu tilefni þar sem tilkynnt var um verðlaunahafa sjóðsins 2010 og komu þau fram á samkomunni. „Það var mikil stemning að hlusta á flutning þessara ungu tónlistarmanna en þau eiga væntanlega eftir að láta að sér kveða í framtíðinni en bæði stefna þau á tónlistarnám erlendis í haust,“ segir á vef LHÍ.

Styrktargangan „Göngum saman“ verður á Ísafirði á sunnudag en hún er árlegur viðburður til styrktar rannsóknum á brjóstakrabbameini. Gengið verður frá gamla sjúkrahúsinu á Ísafirði og hefst gangan kl. 11. Boðið verður upp á tvær vegalengdir, 3 kílómetra og 7 kílómetra. Þátttökugjald er 3.000 krónur en ókeypis er fyrir börn. Göngum saman hefur látið útbúa margs konar gagnlegan varning sem verður til sölu í tengslum við gönguna til styrktar málefnisins. Eftir gönguna verður boðið upp á léttar veitingar. Ísfirðingar og nágrannar eru hvattir til að mæta og styrkja gott málefni.

Þriðja og síðasta ferð ferðaþjónustufyrirtækisins Borea Adventures til Grænlands á þessu sumri, verður farin í dag. Að sögn Rúnar Óla Karlssonar, annars eiganda fyrirtækisins, hefur verið fremur kalt á Grænlandi, en hægur vindur og heiðskýrt. Kajakróður og gönguferðir eru þær útivistir sem stundaðar eru í ferðum sem þessum. „Það er róið allan daginn,“ segir Rúnar Óli. Síðasta ferðin stendur til 9. september. Rúnar Óli segir margt áhugavert að sjá á Grænlandi og nefnir í því sambandi yfirgefið Inúítaþorp og námu þar sem standa yfir rannsóknir á mögulegri gull- og platínuvinnslu.