Skipulags- og mannvirkjanefnd

Lögð fram tilkynning frá samráðsgátt stjórnvalda, dagsett 20. nóvember 2023, þar sem umhverfis-, orku- og loftslagsráðuneyti kynnir til samráðs mál nr. 237/2023, lykilþætti og tillögur til úrbóta sem fram koma í skýrslunni Minjavernd - staða, áskoranir og tækifæri.

Umsagnarfrestur er til 11. desember 2023.

Lögð fram tilkynning frá samráðsgátt stjórnvalda, dagsett 22. nóvember 2023, þar sem innviðaráðuneyti kynnir til samráðs mál nr. 242/2023, „Drög að reglugerð um áætlun eignarmarka.“ Umsagnarfrestur er til og með 7. desember 2023.

Reglugerðardrögin eru samin hjá Húsnæðis- og mannvirkjastofnun. Markmið reglugerðarinnar er að fá betri yfirsýn yfir skráningu á eignarmörkum lands sem nýst geta einstaklingum, stjórnvöldum og öðrum til upplýsinga um eignarhald og afmörkun landeigna. Gildissviðið er afmarkað við áætlun eignarmarka og færslu tengdra upplýsinga inn í landeignaskrá í þeim tilvikum þegar upplýsingar um stærð og eignarmörk skortir. Markmiðið er m.ö.o. að bæta opinbera skráningu hér á landi. Húsnæðis- og mannvirkjastofnun sér um skráningu samkvæmt reglugerðinni í samræmi við lögbundin verkefni stofnunarinnar.

Lögð fram til kynningar hugmynd að breytingu á deiliskipulagi miðbæjar og hafnarsvæðis á Þingeyri, uppdráttur og greinargerð unnið af Trípólí arkitektum í september 2023.

Breytingin snýr að minnkun lóðar við Vallargötu 1 að vestanverðu en lóðin yrði stækkuð lítillega á norðvestur horninu, svo möguleiki verði að færa húsið örlítið til vesturs.

Þá hefur lóðin nr.3 verið minnkuð talsvert að austanverðu og í staðinn gerð ný lóð fyrir nýtt timburhús í gömlum anda sem fengi t.d. lóðarnúmerið 1a.

Tveggja metra breiður göngustígur á bæjarlandi yrði á milli lóðanna 1a og 3.

Lögð fram skipulagslýsing vegna breytinga á Aðalskipulagi Ísafjarðarbæjar 2008-2020 vegna Suðurtanga á Ísafirði, unnin af Verkís ehf. dags. 30. nóvember 2023.

Á fundi skipulags- og mannvirkjanefndar nr. 620 dags. 23. nóvember 2023 lagði nefndin til við bæjarstjórn Ísafjarðarbæjar að heimila vinnu við breytingar á Aðalskipulagi Ísafjarðarbæjar 2008-2020 vegna breyttrar landnotkunar á Suðurtanga.

Unnið er að endurskoðun deiliskipulaga á tanganum og var skipulagslýsing vegna þeirra breytinga kynnt frá 5. október 2023 til og með 6. nóvember 2023 og send umsagnaraðilum til umsagnar. Deiliskipulagsbreytingarnar á Suðurtanganum kalla á aðalskipulagsbreytingu. Unnið er að heildarendurskoðun Aðalskipulags Ísafjarðarbæjar 2008-2020 en í ljós hefur komið að ekki er svigrúm til að bíða eftir gildistöku þess og því er farið í þessa aðalskipulagsbreytingu.

Lögð fram drög að viðauka samnings við Suðurtanga 10 á Ísafirði, áður Suðurtangi 8 vegna lóðarmarkabreytinga. Jafnframt lagt fram mæliblað tæknideildar dags. 22. mars 2022, uppfært 21. nóvember 2023.

Lögð fram drög að nýjum lóðarleigusamningum við Oddaveg 3 og Hafnarbakka 5 á Flateyri eftir samkomulag þinglýstra eigenda út af lóðarmarkabreytingum og minnkun lóða til samræmis við bætta aðkomu að fasteignum við lóðirnar. Jafnframt lögð fram mæliblöð tæknideildar dags. 29. ágúst 2023 fyrir hvora lóð.

Kynnt minnisblað lögfræðistofunnar Juris, dags. 21. nóvember 2023, um vegna lóðarinnar við Skeiði 10 á Ísafirði.

Lögð fram umsagnarbeiðni frá Skipulagsstofnun dags. 21. nóvember 2023 úr skipulagsgátt mál nr. 904/2023, vegna tilkynninga til ákvörðunar um matsskyldu á grundvelli 20. gr. laga um umhverfismat framkvæmda og áætlana nr. 111/2021.

Landeigendur Botns og Dranga áforma byggingu og rekstur allt að 5 MW rennslisvirkjunar með mögulegri dægurmiðlun, sem nýtir hluta rennslis Botnsár og Drangár. Áætlað er að inntaksmannvirki og aðveituskurðir verði staðsett í allt að 450 m h.y.s. í fjarðarbotninum og þaðan liggi niðurgrafin þrýstipípa sunnan árinnar í landi Dranga um 3,5 km leið að stöðvarhúsi sem staðsett verði í um 20 m h.y.s. Stærð stöðvarhúss er áætluð allt að 150 m². Tenging virkjunarinnar yrði með jarðstreng að munna Dýrafjarðarganga.
Botnsá og Drangá eru dragár sem renna til sjávar í botni Dýrafjarðar og eiga þær upptök sín að mestu í vötnum á Glámuhálendinu.

Í umsögn um tilkynningarskyldar framkvæmdir skal koma fram eftir því sem við á, hvort umsagnaraðili telji að nægjanlega sé gerð grein fyrir framkvæmdinni, umhverfi hennar, umhverfisáhrifum, mótvægisaðgerðum og vöktun eftir því sem við á. Jafnframt hvort og þá hvaða atriði umsagnaraðili telur þurfa að skýra frekar og hvort þau kalli að hans mati á að framkvæmdin fari í umhverfismat að teknu tilliti til viðmiða í 2. viðauka laga um umhverfismat framkvæmda og áætlana. Jafnframt skal í umsögn gera grein fyrir leyfum sem framkvæmdin er háð og eru á starfssviði umsagnaraðila.

Á 620. fundi skipulags- og mannvirkjanefndar var afgreiðslu málsins frestað til næsta fundar.

Lögð er fram umsókn um stöðuleyfi frá Lauga ehf. vegna gáms staðsettum á milli Sindragötu 1 og 3. Um er að ræða áframhaldandi stöðuleyfi.

Jafnframt er lögð fram loftmynd af staðsetningu, útlitsmynd ásamt greinargerð.
Þar sem stöðuleyfi er ekki hugsað sem varanlegt úrræði og að áður hefur fengist stöðuleyfi fyrir umræddum gám er óskað afstöðu nefndarinnar vegna málsins.

Á 620. fundi skipulags- og mannvirkjanefndar var starfsmanni nefndar er falið að krefjast skýringa og fá öll gögn sem liggja fyrir. Starfsmanni var einnig falið að vinna minnisblað í samræmi við umræður á fundinum.