Skipulags- og mannvirkjanefnd

Lögð fram til kynningar framkvæmdaáætlun Ísafjarðarbæjar 2024-2034, en allar fastanefndir hafa lagt fram tillögur sínar og óskir um framkvæmdir næstu ára.

Lögð fram staðfesting Skipulagsstofnunar á breytingu á Aðalskipulagi Ísafjarðarbæjar 2008-2020, dags. 14. september 2023, vegna Mjólkárlínu 2 í Arnarfirði.

Jafnframt lagður fram úrskurður nefndar umhverfis- og auðlindamála í máli nr. 106/2023 þar sem kæra barst við ákvörðun bæjarráðs Ísafjarðarbæjar um að samþykkja tillögu um breytingu á Aðalskipulagi Ísafjarðarbæjar 2008-2020 vegna Mjólkárlínu 2, dags. 6. september 2023.
Úrskurðarnefndin vísar kærunni frá.

Lögð fram skipulagslýsing, dags. 24.08.2023, unnin af Eflu, vegna breytinga á Aðalskipulagi Ísafjarðarbæjar 2008-2020 og vinnu við nýtt deiliskipulag baðstaðar í Holtsfjöru, í landi Þórustaða í Önundarfirði.

Gert er ráð fyrir sjóböðum og þjónustubyggingu með búningsklefum, gufuböðum og veitingastað í um 200 metra fjarlægð vestan við Holtsbryggju. Sjóböðin verða í fjöruborðinu og mynda sterka tengingu við hafið og ströndina.

Lögð fram umsögn Umhverfisstofnunar dags. 29. september 2023 vegna óska Atlastaða, sumarhúsafélags, um leyfi til að lagfæra slóða sem liggur frá lendingaraðstöðu fyrir báta við slysavarnarskýlið að Atlastöðum í Fljótavík. Jafnframt er óskað eftir leyfi til að byggja brú yfir Krossalæk.

Áður tekið fyrir á fundi nefndar nr. 615 og þar var óskað eftir umsögn Umhverfisstofnunar m.t.t. auglýsingar um friðlandið á Hornströndum nr. 332/1985.

Lagðir fram tölvupóstar, dags. 20. september og 9. október 2023, frá íbúum við Túngötu 12 á Ísafirði, varðandi framkvæmdir við leikvöll á Eyrartúni, Ísafirði haustið 2023.

Lögð er fram umsókn Guðmundar Gunnars Guðnasonar hjá SG húsum f.h. Teits Magnússonar, um byggingarleyfi vegna einbýlishúss. Jafnframt er lagður fram afstöðuuppdráttur dags. 20. september 2023 og aðaluppdráttasett dags. 5. október 2023, frá SG húsum.

Skipulags- og mannvirkjanefnd óskaði eftir frekari gögnum þ.e. afstöðumynd sem sýnir fjarlægð mannvirkja aðliggjandi lóða áður en hægt yrði að taka afstöðu til umsóknar á 615. fundi sínum 14. september. s.l.

Nú eru lögð fram uppfærð gögn sem sýna afstöðu. Fyrirhugað hús er fært frá aðliggjandi lóð um rúma 6 metra en hús mun ná út fyrir byggingarreit eða um 1.900 mm.

Lögð er fram umsókn Pálmars Kristmundssonar f.h Palmark ehf. dags. 11. september 2023, vegna beiðni um samþykki á reyndarteikningum og að byggingin sem áður hýsti söluskála Esso olíufélags verði skráð sem fasteign í eigu Palmark ehf, en umrætt fyrirtæki er nú skráð fyrir einum af þremur fasteignum á lóðinni.
Jafnframt er lagður fram aðaluppdráttur frá PK arkitektum.

Þar sem mannvirkið er ekki skráð í fasteignaskrá, hvorki eignarhald né stærð þá er óskað eftir áliti skipulags- og mannvirkjanefndar vegna erindisins.

Á 616. fundi skipulags- og mannvirkjanefndar, þann 28. september 2023, var lögð fram fyrirspurn frá Óðni Þórarinssyni f.h. Veðurstofu Íslands um að fá að færa sjálfvirka veðurstöð stofnunarinnar. Samhliða fyrirspurn er lagt fram til kynningar skjal er segir til um fyrirhugaða staðsetningu sem og gerð og stærð mannvirkisins. Nefndin frestaði málinu og fól starfsmanni að kalla eftir umsögn Golfklúbbs Ísafjarðar vegna málsins.

Samþykki Golfklúbbs Ísafjarðar liggur nú fyrir.

Lagt fram bréf Stefáns Guðmundssonar, f.h. umhverfis-, orku- og loftslagsráðuneytis, dags. 26. september 2023 vegna uppbyggingar innviða vegna orkuskipta.

Á 1257. fundi bæjarráðs, þann 2. október 2023, var erindinu vísað til skipulags- og mannvirkjanefndar.

Bæjarráð bókað eftirfarandi: „Nauðsynlegt er að gera ráð fyrir í aðalskipulags- og deiliskipulagsvinnu að full orkuskipti eigi sér stað, s.s. á flugvöllum, höfnun og svæðum fyrir hópbifreiða- og flutningabíla.

Bæjarráð leggur þó áherslu á að á Vestfjörðum er ekki næg orka til fullra orkuskipta, enda vantar 35 megawött af raforku á svæðið mv. árið 2030, ef horft er til nýútkominnar skýrslu umhverfis-, orku- og loftslagsráðuneytis.“

Er málið nú lagt fram til kynningar.

Lögð fram tilkynning frá samráðsgátt stjórnvalda, dagsett 20. september 2023, þar sem innviðaráðuneyti kynnir til samráðs mál nr. 167/2023, Drög að hvítbók um skipulagsmál og umhverfismatsskýrsla. Umsagnarfrestur er til og með 31. október 2023.

Lögð fram umsókn, dags. 8. febrúar 2022, frá þinglýstum eigendum Brekku á Ingjaldssandi vegna nýstofnunar lóðar út úr jörðinni, með heitinu Fornusel, jafnframt lagt fram hnitsett lóðarblað dags. 30. ágúst 2023 unnið af M11 arkitektum.

Lagt fram álit Skipulagsstofnunar dags. 8. september 2023, á matsáætlun um laxeldi Arnarlax í Arnarfirði - Aukning heildarlífmassa um 4.500 tonn og breyting á afmörkun eldissvæða. (Arnarlax og Verkís. 17. mars 2023).

Í matsáætlun framkvæmdaraðila eru kynnt áform Arnarlax um að auka umfang sjókvíaeldis fyrirtækisins í Arnarfirði um 4.500 tonn, auk stækkunar á eldissvæðum, og gerð grein fyrir hvernig fyrirtækið hyggst standa að mati á umhverfisáhrifum framkvæmdarinnar.

Núgildandi leyfi Arnarlax heimila fyrirtækinu eldi á allt að 11.500 tonnum af laxi á hverjum tíma.
Áform fyrirtækisins felast í að auka lífmassa í firðinum um allt að 4.500 tonn. Heildarlífmassi í eldi Arnarlax í Arnarfirði verður því allt að 16.000 tonn gangi áformin eftir. Auk þess að auka við lífmassa áformar fyrirtækið að stækka og breyta afmörkun eldissvæða við Hlaðsbót, Tjaldanes, Hringsdal, Kirkjuból og Fossfjörð

Lögð fram til kynningar fundargerð vinnufundar fulltrúa í skipulags- og mannvirkjanefnd vegna endurskoðunar Aðalskipulags Ísafjarðarbæjar, en fundur var haldinn í Holti 28. september 2023.