Skipulags- og mannvirkjanefnd

Ný skipulagsgátt var opnuð 1. maí 2023.
Skipulagsgáttin er samráðsgátt um skipulagsmál, mat á umhverfisáhrifum og framkvæmdaleyfi. Þar er hægt að finna upplýsingar um öll mál í vinnslu, setja fram athugasemdir og ábendingar við mál á kynningartíma og nálgast endanleg gögn og afgreiðslur. Í gegnum Skipulagsgáttina er aðgengi að skipulags- og umhverfismatsferlum einfaldað og almenningur getur fylgst með og látið sig málin varða milliliðalaust.

https://skipulagsgatt.is/

Kynntar umsagnir og athugasemdir sem bárust á auglýsingatíma við tillögu að breytingu á Aðalskipulagi Ísafjarðarbæjar 2008-2020, vegna fyrirhugaðrar íbúðarbyggðar á landfyllingu norðan Eyrar. Tillagan var í auglýsingu frá 3. mars 2023 til 2. maí 2023. 5 umsagnir bárust frá umsagnaraðilum og 15 athugasemdir bárust frá almenningi.

Kynnt drög að skipulagslýsingu á nýju deiliskipulagi fyrir miðbæ Ísafjarðar, unnin af Verkís ehf. 10. maí 2023 skv. 40. gr. skipulagslaga nr. 123/2010.

Gert er ráð fyrir að unnið verði nýtt deiliskipulag fyrir miðbæ Ísafjarðar og að samhliða gildistöku þess verði eldra deiliskipulag fyrir miðbæinn fellt úr gildi. Jafnframt er gert ráð fyrir að breyta mörkum deiliskipulaganna eyrin á Ísafirði og hafnarsvæði til samræmis við mörk nýja deiliskipulagsins.

Skipulagssvæðið tekur til Hafnarstrætis frá Eyrartúni að Silfurtorgi, Aðalstrætis frá Silfurtorgi að Mjósundi, Pollgötu og Suðurgötu að Njarðarsundi auk þvergatna innan reitsins. Afmörkun svæðisins til austurs miðast við mörk lóða við Hafnarstræti og Aðalstræti. Mörk svæðisins til vesturs liggja um Pollinn. Mörk nýja deiliskipulagsins verða einnig aðlöguð að mörkum deiliskipulagsins fyrir þjónustusvæði á Torfnesi.

Lagður fram tölvupóstur Sigrúnar Helgu Sigurjónsdóttur f.h. nefnda- og greiningasviðs Alþingis, dagsettur 5. maí 2023, þar sem Ísafjarðarbæ er sent til umsagnar frumvarp til laga um tímabundnar undanþágur frá skipulags- og byggingarlöggjöf og skipulagi, 1028. mál. Umsagnarfrestur er til 17. maí.

Lagður fram tölvupóstur dags. 13. apríl 2023 frá G. Stellu Árnadóttur hjá Umhverfisstofnun, þar sem eru kynntar breytingar á boðun reglubundins eftirlits og nýja gjaldskrá Umhverfisstofnunar skv. meðfylgjandi skjölum.
Rekstraraðilar eru beðnir um að kynna sér þessi skjöl og hefur nýtt fyrirkomulag nú þegar tekið gildi.

Jafnframt er kynntur nýr gagnagrunnur stofnunarinnar um mengaðan jarðveg og verður skjalið kynnt í reglubundnum eftirlitum ársins.

Lögð fram umsókn, dags. 8. maí 2023, frá Jóni G. Magnússyni f.h. Tvísteina ehf., um lóðir við Tungubraut 10, 12, 14 og 16 á Ísafirði, ætlað undir 4ra íbúða raðhús. Jafnframt lagt fram mæliblað lóða frá tæknideild dags. 27. janúar 2021.

Lagður fram tölvupóstur frá Jóni G. Magnússyni f.h. eigenda Hóls í Firði í Önundarfirði, dag. 24. apríl 2023 þar sem landeigendur óska eftir að áform um stækkun virkjunar í landi jarðarinnar verði tekin með í vinnu við uppfærslu á Aðalskipulagi Ísafjarðarbæjar 2020-2032.

Þar er í nú dag vatnsaflsvirkjun í Hólsá sem rennur í landi Hóls í Firði. Er sú virkun að framleiða u.þ.b 50kw í dag miða við að nýta 80 m fallhæð og einungis hluta vatnsmagns árinnar.

Áform eru að fara með inntaksmannvirki hærra í landið og færa stöðvarhús neðar. Þá yrði fallhæð milli 170-180 m og samhliða því að nýta vatnsrennsli árinnar betur gæti virkjunin framleitt 500-600 kw.

Kynnt staða við vinnu á Aðalskipulagi Ísafjarðarbæjar 2020-2032.

Lagður fram tölvupóstur frá Hlyni T. Torfasyni, skipulagsfulltrúa Strandabyggðar dags. 26. apríl 2023, þar sem er óskað umsagnar Ísafjarðarbæjar við skipulagslýsingu vegna breytinga á Aðalskipulagi Strandabyggðar 2010-2022 og gerð deiliskipulags í tengslum við Kvíslatunguvirkjun, sbr. 1. mgr. 30. gr. og 1. mgr. 40. gr. skipulagslaga nr. 123/2010.