Fræðslunefnd

Lagt fram bréf Jöfnunarsjóðs sveitarfélaga dagsett 31. október sl., þar sem greint er frá stöðu mála hvað framgang samkomulags ríkis og sveitarfélaga um eflingu tónlistarnáms og jöfnun á aðstöðumun nemenda til námsins varðar. Fyrir liggur bráðabirgðaúthlutun fyrir skólaárið 2012-2013.

Lagðar fram niðurstöður úr foreldrakönnunum leikskólanna Sólborgar, Eyrarskjóls, Grænagarðs, Laufáss og Tjarnarbæjar.

Lagt fram bréf dagsett í desember 2012, þar sem leikskólastjórar Tjarnarbæjar, Laufáss og Grænagarðs óska eftir að fá að færa til starfsdaga sem áttu að vera í apríl þar til í júní,vegna ferðar sem leikskólarnir eru að skipuleggja til Póllands, þar sem áætlað er að heimsækja fjóra leikskóla.

Lagt fram minnisblað dagsett 10. desember 2012, frá Sigurlínu Jónasdóttur skóla- og sérkennslufulltrúa á skóla- og tómstundasviði, þar sem óskað er eftir að 3. lið í innritunarreglum leikskóla verði breytt. Í 3. lið segir að: Í forgangshópi um heildagspláss, geta verið börn sem búa við fötlun og/eða veikindi og börn sem búa við félags - og fjárhagsörðugleika. Með umsókn þeirra skal skila vottorði um sambúðarslit eða umsögn frá Skóla- og fjölskylduskrifstofu og/eða svæðisskrifstofu fatlaðra, eftir því sem við á. Óskað er eftir að honum verði breytt þannig: Sækja má um forgang fyrir barn ef sérstakar aðstæður mæla með því. Umsóknum um forgang skal skila til skóla- og tómstundasviðs. Sækja má um forgang vegna barna með sérþarfir og vegna barna sem búa við erfiðar félagslegar aðstæður.

Lagt fram erindisbréf fræðslunefndar sem samþykkt var 18. desember 2003, þar sem öll erindisbréf nefnda sveitarfélagsins eru í endurskoðun.

Lögð fram tillaga til þingsályktunar um framkvæmdaáætlun í málefnum fatlaðs fólks til ársins 2014.

Lögð fram jafnréttisstefna Ísafjarðarbæjar 2012-2014.

Lagt fram tölvubréf frá Önnu Þóru Ísfold, verkefnastjóra Nýsköpunarkeppni grunnskólanemenda, dagsett 13. nóvember sl., þar sem óskað er eftir framlagi í formi hvatningar og styrks við verkefnið ,,Nýsköpunarkeppni grunnskólanema?.

Lögð fram skýrsla um skólahald 2011-2012 frá Grunnskólanum á Þingeyri og starfsáætlun Grunnskólans á Suðureyri 2012-2013.

Lagt fram bréf frá Jöfnunarsjóði sveitarfélaga dagsett 31. október sl., er varðar framlög til sveitarfélaga vegna nýbúafræðslu á fjárhagsárinu 2013. Heildar framlag til Ísafjarðarbæjar á árinu 2013 er kr. 3.960.000.- og er þar miðað við að fjöldi nýbúa séu 33 talsins.

Lagt fram fréttabréf Grunnskólans á ísafirði fyrir nóvember 2012.

Lagt fram tölvubréf dagsett 10. desember 2012 frá Svandísi Ingimundardóttur skólamálafulltrúa sambands íslenskra sveitarfélaga, þar sem kynnt er að frá og með 1. janúar 2013 flyst yfirumsjón og framkvæmd ytra mats á leikskólum frá mennta - og menningarmálaráðuneytinu til Námsmatsstofnunar. Á vormisseri verða gerðar úttektir á þremur leikskólum og er auglýst eftir sveitarfélögum sem hafa áhuga á því að fram fari úttekt á þeirra leikskólum. Umsóknir skulu berast fyrir 31. desember 2012.