Bæjarráð

Lagt fram til kynningar ferli fjárhagsáætlunargerðar 2022, en áætlað er að ferlið hefjist í júní 2021 og ljúki í nóvember 2021. Jafnframt lagt fram til kynningar ferli við gerð launaáætlunar fyrir 2022.

Lagt fram til kynningar minnisblað Eddu Maríu Hagalín, fjármálastjóra og Ásgerðar Þorleifsdóttur, deildarstjóra launadeildar dags. 21. apríl 2021, þar sem teknar eru saman upplýsingar um skatttekjur og laun fyrir janúar til mars 2021.

Lagt fram erindi umboðsmanns Alþingis, dags. 13. apríl 2021, þar sem óskað er gagna vegna meðferðar máls.

Lagt fram minnisblað Axels R. Överby, sviðsstjóra umhverfis- og eignasviðs, dags. 23. apríl 2021, þar sem óskað er eftir að heimila gerð viðauka vegna framkvæmda við loftræstingu á leikskólanum Sólborg.

Lagt fram minnisblað Hafdísar Gunnarsdóttur, sviðsstjóra skóla- og tómstundasviðs, dags. 15. apríl 2021, þar sem lagt er til við bæjarráð að taka afstöðu til þess hvort fela eigi forstöðumanni skíðasvæðisins að hafa yfirumsjón með golfvellinum í Tungudal. Jafnframt er lagt til við bæjarráð á málinu verði vísað inn í íþrótta- og tómstundanefnd til umsagnar.

Á 1149. fundi bæjarráðs, þann 19. apríl 2021, var málinu vísað til umsagnar í íþrótta- og tómstundanefnd.

Á 222. fundi nefndarinnar, þann 21. apríl 2021, bókaði nefndin eftirfarandi:
„Íþrótta- og tómstundanefnd telur hugmyndina áhugaverða. Aftur á móti telur hún að skilgreina þurfi nánar verkefni og umfang svo liggi ljóst fyrir að forstöðumaður anni bæði heilsársnotkun skíðasvæðis og svo golfvelli.“

Á 1148. fundi bæjarráðs, þann 12. apríl 2021, var lagður fram tölvupóstur Bjarka Stefánssonar, framkvæmdastjóra HSV, dags. 17. mars 2021, ásamt bréfi aðalstjórnar Vestra, dags. 8. mars 2021, þar sem upplýst er um 4,4m kr. húsaleiguskuld félagsins á árunum 2019-2020, og óskað aukins styrks frá sveitarfélaginu vegna leigugreiðslna á árinu 2021.
Jafnframt lagt fram erindi Guðfinnu Hreiðarsdóttur, formanns íþróttafélagsins Vestra, dags. 5. febrúar 2021, til HSV, vegna stöðu íþróttastarfs vegna Covid-19. Að auki lagt fram yfirlit yfir tekjutap íþróttafélaganna á árunum 2020 og 2021 vegna Covid-19, samantekið af Bjarka Stefánssyni, framkvæmdastjóra HSV.
Málinu var vísað til íþrótta- og tómstundanefndar til umsagnar.

Á 222. fundi íþrótta- og tómstundanefndar, þann 21. apríl 2021, var eftirfarandi bókað:
„Íþrótta- og tómstundanefnd hefur skilning á erfiðri fjárhagsstöðu íþróttafélaga á tímum Covid-19. Hinsvegar leggur hún mikla áherslu á að jafnræðis sé gætt innan íþróttahreyfingarinnar þegar kemur að fjárútlátum og styrkjum frá Ísafjarðarbæ.“

Lagður fram til samþykktar samningur Ísafjarðarbæjar við knattspyrnudeild Vestra meistaraflokks um umsjá knattspyrnuvalla á Torfnesi og 1. hæð í Vallarhúsi Torfnesi.

Lagður fram tölvupóstur Díönu Jóhannsdóttur, f.h. Vestfjarðastofu, dags. 21. apríl 2021, þar sem sveitarfélaginu er boðið að taka þátt í markaðsátakinu Keyrðu kjálkann - sumarið 2021.

Lagður fram tölvupóstur Sigríðar Helgu Sigurjónsdóttur f.h. nefndasviðs Alþingis, dagsettur 21. apríl 2021, þar sem Ísafjarðarbæ er send til umsagnar tillaga til þingsályktunar um skráða sambúð fleiri en tveggja aðila, 539. mál. Umsagnarfrestur er til 5. maí.

Lagður fram tölvupóstur Hildar Edwald f.h. nefndasviðs Alþingis, dagsettur 23. apríl 2021, þar sem Ísafjarðarbæ er sent til umsagnar frumvarp til laga um uppbyggingu og rekstur flugvalla og þjónusta við flugumferð, 702. mál. Umsagnarfrestur er til 4. maí.

Lagður fram tölvupóstur Hildar Edwald f.h. nefndasviðs Alþingis, dagsettur 21. apríl 2021, þar sem Ísafjarðarbæ er sent til umsagnar frumvarp til laga um breytingu á lögum um fjármál stjórnmálasamtaka og frambjóðenda og um upplýsingaskyldu þeirra, nr. 162/2006 (gagnsæi, skráning og vinnsla persónuupplýsinga), 668. mál. Umsagnarfrestur er til 12. maí.

Fundargerð 222. fundar íþrótta- og tómstundanefndar lögð fram til kynningar, en fundur var haldinn 21. apríl 2021.

Fundargerðin er í átt liðum.