Bæjarráð

Fulltrúar almannavarna mæta á fundinn til að ræða vinnu aðgerðarstjórnar og hvaða lærdóm sé hægt að draga af atburðunum með tilliti til aðgerðarstjórnar, m.a. aðstöðu aðgerðarstjórnar.

Kynnt er áætlun Heilbrigðisstofnunar Vestfjarða um að standa fyrir námskeiðum fyrir vettvangsliða á Ísafirði og Patreksfirði og að hluta til í fjarnámi, sem fram kom í tölvupósti Gylfa Ólafssonar, forstjóra. Námskeiðið er ætlað þeim sem hafa áhuga á að veita fyrstu hjálp og búa í smærri byggðakjörnum Vestfjarða sem er langt frá sjúkrahúsi eða sem getur lokast af í fárviðrum.

Lagt er fram minnisblað Helgu Ásgeirsdóttur, verkefnastjóra á fjármálasviði, dags. 24. janúar sl., um skatttekjur og laun frá janúar til desember 2019. Þar má sjá að útsvarstekjur eru 97,4 m.kr. undir áætlun og eru 2.195,8 m.kr. fyrir árið. Jöfnunarsjóður er 15,8 m.kr. yfir áætlun eða 952,7 m.kr. Að lokum er launakostnaður 34,5 m.kr. undir áætlun en launakostnaðurinn nemur 2.644,7 m.kr. í lok árs 2019.

Lagt er fram minnisblað Eyþórs Guðmundssonar, innkaupa- og tæknifulltrúa Ísafjarðarbæjar, dags. 24. janúar sl., vegna lokunar á koparlínum sem hefur áhrif á neyðarhnappana á Hlíf. Auk þess eru lögð fram drög að viðauka 4 með tillögu að endurnýjun neyðarhnappa. Kostnaðurinn er 670.000,- án vsk. auk mánaðarlegrar áskriftar að þeim hnöppum sem eru í þjónustu, árlegur kostnaður er kr. 1,75 m.kr. Samtals kostnaður vegna neyðarhnappa sem ekki ert gert ráð fyrir á árinu 2020 er því kr. 2,42 m.kr., fært á móti ófyrirséðum kostnaði.

Lagður fram viðauki 3 við fjárhagsáætlun 2020. Um er að ræða 4,9 m.kr. styrk til björgunarsveita í Ísafjarðarbæ og Bolungarvík sem og Rauðakrossdeild í þakklætisskyni fyrir björgunarstörf á Flateyri og í Súgandafirði. Þessum kostnaði er mætt með lækkun á 5 m.kr. áætluðu viðhaldi í Funa. Áhrif viðaukans á rekstrarniðurstöður samantekins A og B hluta Ísafjarðarbæjar er því kr. 0,- eða óbreytt afkoma kr. 168.000.000,-. Áhrifin á sveitasjóð A hluta er neikvæð um kr. 5.000.000,- og fer úr afkomu kr. 29.000.000,- í afkomu kr. 24.000.000,-

Tekin er fyrir beiðni frá Gísla Eiríkssyni, f.h. Skógræktarfélags Ísafjarðar um styrk til greiðslu framkvæmdaleyfis vegna stígagerðar í Eyrarhlíð. Framkvæmdaleyfið er að fjárhæð kr. 81.613,-.

Kynnt er samkomulag Ísafjarðarbæjar og Eldvarnabandalagsins um samstarf um aukningu eldvarna og innleiðingu eigin eldvarnaeftirlits, ódags. 2020.

Lagður er fram tölvupóstur Hildar Edvald, f.h. nefndarsviðs Alþingis, dags. 24. janúar sl., þar sem óskað er eftir umsögn við frumvarpi til breytingu á lögum um málefni innflytjenda, nr. 116/2012 (móttaka flóttafólks og innflytjendaráð), 457. mál.

Lagður er fram tölvupóstur Sigríðar Kristjánsdóttur, framkvæmdastjóra Vestfjarðarstofu, dags. 23. janúar sl., ásamt drögum að greinargerð innviðamála. Bæjarfulltrúar eru boðaðir til fundar með átakshóp ríkisstjórnarinnar vegna fárviðris í desember 2019. Fundurinn verður haldinn mánudaginn 27. janúar n.k.

Lagður er fram tölvupóstur Peter Weiss, forstöðumanns Háskólaseturs Vestfjarða, dags. 16. janúar sl., ásamt fundarboði til stofnaðila til stefnumótunarfundar Háskólaseturs Vestfjarða sem haldinn verður 30. janúar n.k. milli kl. 11:30 og 18:00 í Háskólasetrinu.

Lagður er fram tölvupóstur Vals Rafns Halldórssonar, sviðsstjóra rekstrar- og útgáfusviðs Sambands íslenskra sveitarfélaga, dags. 21. janúar sl., ásamt fundarboði Karls Björnssonar, framkvæmdastjóra, dags. 20. janúar sl., á 35. landsþing Sambands íslenskra sveitarfélaga sem haldið verður 26. mars n.k. milli kl. 10:30 og 15:45.